Dayik


Toz
dûkel
barût
Û di nava xwîna kombûyî de
tirîfê heyvê didê çavê min

Heyv
Di himêza xwînê de raketî bû
Di hestiyê milê min de
janekî zîrav
Gûleyek
bê bang bûbû mêvan
Şev bêdeng e
şev miriye
Tenê dengê hilmgirtinekê dihate gûhê min
Hevalê min
li deriyê mirinê dida
Teq… teq… teq…
Mirin ne li mal bû
An wê jî rû gûherti bû li me

Tama şîrê berê te
hinavê min dagirtiye dayê
Çêjekî teze

* *

Sitêrkên asîmanê min
gûleyên rengîn bûn wê şevê
Awazê xwezayê jî
Nalîna birîndarekî bênav bû

Hema çend gava li pêş min
Li pişta komên gûniya
Hel hel û qijewîja çeqelan
Nêçîrvanên seriyan
Cejna wan bû îro
Dû serî bi dest dixistin

Yek yê min
Yek yê hevalê min

Wêneyê rûxsarê te
Çavên minî şil nixûmand dayê

* *

Asîman qermiçî bû wê kêliyê
Heyv digrî
Hêviya min
li pişta çiyayê bilind veşartî bû
di asoyê xeyalê min de
komekî zarokan dîlan digirt
Zaroktiya min
di çavên keçikekî de di reqisî
Bêmirinî jê di pejiqî

Wek şakarekî xwedayî
Xemilî bû keçika ciwan û zaroktiya min
Heyv jî nixûmî
Dorpêça agir
bere bere li me teng dibû
Ne di zanî kû em jî ji agirin

Birsîbûnê cendekê min di gûvaşt
Ew jî li me hatibû xezebê
Nanê di berîka êlekê min de
di nava xwîna hevalê min de xeniqî bû

Min xeyala nanê te xwar dayê
Xeyala nanê te

* *

Hebûn
di nava tinebûnê de veşartî bû
Evîn
bi xwîna sor ve hebû
Ez jî bi te hebûm dayê
bi te ve

* *
Yek bi yek herifîn dîwarên tirsê
Bi gûleyên nêçîrvanên seriyan
Gûhê min ne di bihîst
Tenê dengekî olan dida di mêjiyê min de
“ heval em bibine sitêrk „
em bi hevre di kenîn
lêvên bi ken
carekî dîtir ne hatine ser hev

Ken bê dawî dibû
Deng qût bûbû
Dojeh aram bûbû

Bi tenê bûm dayê
Ez

Cendekê bêliv
Û hêviya minî veşartî

* *

şev sar e
şev xewle ye
navê me
wekî yê herkesî nayê nivîsîn
şervanên bênavin em
çîrokekî nihênî
çîrokekî kesnezan

megrî dayê megrî
ma ne ji bo kenê te bû ev şev
megrî dayê

carê kû hatin rondikên te yî jar
destê hêviya min bigre
bi berbangê re
li çiyayên bilind binêrê
tê li ser çiyan
gelavêjê û gûlekî beharê bibînê

Ez bûme gelavêj dayê mizgîniya rojê

You may also like...

Bersivekê binivîsin

E-posta hesabınız yayınlanmayacak. Gerekli alanlar * ile işaretlenmişlerdir

This site uses Akismet to reduce spam. Learn how your comment data is processed.